Shirika la Reli Tanzania (TRC) limetangaza mafanikio makubwa kwa kusafirisha abiria zaidi ya milioni moja katika kipindi cha miezi minne tu tangu uzinduzi wa huduma za treni za umeme (SGR) kati ya Dar es Salaam na Dodoma mwezi Juni mwaka huu. Hii ni ongezeko kubwa ikilinganishwa na treni ya zamani (MGR), ambayo ilisafirisha abiria 400,000 katika kipindi cha mwaka mzima.

Kwa mujibu wa Fredy Mwanjala, Mkuu wa Kitengo cha Uhusiano TRC, mafanikio haya yanaonyesha jinsi huduma hiyo ya kisasa imepokelewa vizuri na Watanzania. Alisema, "Tunatambua umuhimu wa huduma hii katika kuboresha usafiri, kuongeza ufanisi wa biashara, na kutoa chaguo salama na la haraka kwa abiria. Tunawashukuru sana abiria wetu kwa kuunga mkono jitihada hizi."

Mapato na Ajira

Taarifa ya hivi karibuni imeonyesha kuwa abiria 645,421 waliosafirishwa hadi Septemba mwaka huu wameingiza mapato ya zaidi ya Shilingi bilioni 15.695. Waziri wa Nchi, Ofisi ya Rais, Mipango na Uwekezaji, Profesa Kitila Mkumbo, alithibitisha taarifa hiyo wakati akiwasilisha bungeni mapendekezo ya Mpango wa Maendeleo wa Taifa wa mwaka 2025/2026.

Zaidi ya ajira 180,176 zimezalishwa kutokana na ujenzi wa awamu ya kwanza ya SGR kati ya Dar es Salaam na Dodoma, huku sekta ya viwanda ikinufaika na ongezeko la mahitaji ya saruji, nondo, na vifaa vingine vya ujenzi.

Faida kwa Watumiaji na Sekta ya Usafiri

Huduma ya SGR imepunguza muda wa safari kati ya Dar es Salaam na Dodoma kutoka wastani wa saa 10 kwa basi hadi saa tatu na nusu kwa treni. Huku imeongeza ufanisi wa usafiri na kupunguza gharama za muda kwa wasafiri.

Wadau wa sekta ya usafiri wamepongeza mafanikio ya TRC. Issa Nkya, Mweka Hazina wa Chama cha Wamiliki wa Mabasi Tanzania (TABOA), ameshauri TRC kuwa makini kuendesha mradi huo kwa ufanisi ili kuepusha hasara kwa taifa. Naye Rahim Dossa, Msemaji wa Chama cha Wamiliki wa Malori Tanzania (TATOA), alisema mradi huu ni hatua kubwa kwa maendeleo ya usafiri nchini.

Mikakati ya Baadaye

TRC imeahidi kuendelea kuboresha huduma zake, kuongeza miundombinu, na kuhakikisha mahitaji ya wateja yanakidhiwa. Mwanjala ametoa wito kwa Watanzania kuipenda na kuilinda miundombinu ya SGR ili kuhakikisha inatoa huduma yenye tija kwa muda mrefu.

Kwa sasa, safari za treni kati ya Dar es Salaam na Morogoro zilianza tarehe 14 Juni mwaka huu, huku huduma ya Dar es Salaam hadi Dodoma ikianza rasmi tarehe 25 Julai. Mafanikio haya yanaashiria mwanzo mzuri wa mabadiliko makubwa kwenye sekta ya usafiri nchini Tanzania.